ખેડૂત મિત્રો, શું તમે પણ રાત-દિવસ જાગીને કરેલી મહેનત પર રોજ (નીલગાય) કે ભૂંડ રાતોરાત પાણી ફેરવી જાય છે? ખેતરમાં ઊભા પાકને જંગલી જાનવરોથી બચાવવો એ આજકાલ સૌથી મોટો પડકાર બની ગયો છે. પરંતુ હવે ચિંતા કરવાની જરૂર નથી! ગુજરાત સરકાર ખેડૂતોની વહારે આવી છે અને ‘તાર ફેન્સીંગ યોજના 2026’ હેઠળ ખેતરની ફરતે કાંટાળી વાડ બનાવવા માટે સીધી 50% આર્થિક સહાય આપી રહી છે.
તાર ફેન્સીંગ યોજના 2026 શું છે?
જંગલી પશુઓથી પાકને થતા નુકસાનને અટકાવવા માટે ગુજરાત સરકાર દ્વારા દર વર્ષે આઈ-ખેડૂત પોર્ટલ (i-Khedut) પર તાર ફેન્સીંગ યોજના ચલાવવામાં આવે છે. આ યોજના હેઠળ ખેડૂતોને પોતાના ખેતરની હદ પર લોખંડના થાંભલા અને કાંટાળા તારની મજબૂત વાડ બનાવવા માટે કુલ ખર્ચના 50% સબસિડી સીધી બેંક ખાતામાં આપવામાં આવે છે.
યોજનાના મુખ્ય ફાયદાઓ
- 50% સહાય: કાંટાળી વાડ અને થાંભલા ઊભા કરવાના કુલ ખર્ચના 50% (કે નિયત કરેલ મર્યાદા મુજબની રકમ) સરકાર ચૂકવે છે.
- રોજ-ભૂંડથી 100% સુરક્ષા: ખેતરમાં ભૂંડ, રોજડાં કે અન્ય રખડતા પશુઓ પ્રવેશી શકશે નહીં.
- પાક અને આવકમાં વધારો: જાનવરોથી પાકને નુકસાન ન થવાથી ઉત્પાદન વધશે અને ખેડૂતની આર્થિક સ્થિતિ મજબૂત બનશે.
કોને મળશે આ યોજનાનો લાભ? (નિયમો અને પાત્રતા)
સરકારે નિયમોમાં મોટા સુધારા કરી નાના અને સીમાંત ખેડૂતોને પણ લાભ આપવાનો ઐતિહાસિક નિર્ણય કર્યો છે:
- ઓછામાં ઓછી 2 હેક્ટર જમીન: અગાઉ 5 હેક્ટર જમીનની મર્યાદા હતી, જે હવે ઘટાડીને માત્ર 2 હેક્ટર (આશરે 12.5 વીઘા) કરી દેવામાં આવી છે.
- ગ્રુપ બનાવીને પણ લાભ: જો કોઈ એક ખેડૂત પાસે 2 હેક્ટર જમીન ન હોય, તો આજુબાજુના 2 કે તેથી વધુ ખેડૂતો ભેગા મળીને (ગ્રુપ બનાવીને) પણ આ યોજનાનો લાભ લઈ શકે છે.
- ગુજરાતના તમામ ખાતેદાર ખેડૂતો આ યોજનામાં ફોર્મ ભરવા પાત્ર છે.
ફોર્મ ભરવા માટે જરૂરી ડોક્યુમેન્ટ્સ
અરજી કરતા પહેલા ખેડૂત મિત્રોએ નીચે મુજબના આધાર-પુરાવા તૈયાર રાખવા:
- અરજદાર ખેડૂતનું આધાર કાર્ડ
- જમીનના 7/12 અને 8-અ ના તાજા ઉતારા
- બેંક પાસબુકની નકલ અથવા કેન્સલ ચેક
- રેશનકાર્ડની નકલ
- જો ગ્રુપમાં અરજી કરતા હોય તો તમામ ખેડૂતોનું સંમતિ પત્રક (ગ્રુપ લીડરની વિગતો સાથે)
ઓનલાઈન અરજી કેવી રીતે કરવી?
આ યોજનાનો લાભ લેવા માટેની પ્રક્રિયા સંપૂર્ણપણે ઓનલાઈન છે, જે તમે ઘરે બેઠા કે ગ્રામ પંચાયતમાં VCE મારફતે કરી શકો છો:
- સૌથી પહેલાં ગુજરાત સરકારના સત્તાવાર i-Khedut Portal (ikhedut.gujarat.gov.in) પર જાવ.
- ‘યોજનાઓ’ વિભાગમાં જઈને ‘ખેતીવાડીની યોજનાઓ’ પર ક્લિક કરો.
- ત્યાં ‘ખેતરની ફરતે કાંટાળી વાડ બનાવવાની યોજના’ શોધીને “અરજી કરો” પર ક્લિક કરો.
- તમામ વિગતો ધ્યાનપૂર્વક ભરીને ફોર્મ ઓનલાઈન સબમિટ કરો અને તેની પ્રિન્ટ કાઢી લો.
- આ પ્રિન્ટ સાથે જરૂરી ડોક્યુમેન્ટ જોડીને 7 દિવસની અંદર ગ્રામ સેવક અથવા તાલુકા પંચાયતની ખેતીવાડી કચેરી (વિસ્તરણ અધિકારી) ને જમા કરાવવાના રહેશે.